Kesemua Empat Iku Orang Ke Lari Ari Jil Mujur Ditangkap Baru

Spread the love

KUCHING, 6 Julai: Sepengudah lima hari operasyen ngiga dua iku orang ke lari ari Jil Puncak Borneo, raban polis udah mujur nangkap baru dua iku orang nya enda jauh ari palan transit jil nya.

Sida ditangkap raban Tiger Platoon ari Pasukan Gerakan Am (PGA) urung pukul 2.30 lemai Hari Satu ba sebelah genturung pendiau Batu 11, Padawan.

Sapit Tuai Polis Pelilih Padawan, DSP Lim Jaw Shyong madah, kedua-dua saspek nya ditemu belalai dalam paya lalu semina ayan pala aja.

Raban polis bejalaika operasyen sepengudah sida nerima pemadah ari mensia mayuh, lalu operasyen tu asil kereja sama mayuh bengkah ejensi.

“Sepengudah nerima pemadah ari peranak ti mendam ba genturung pendiau ke alai saspek ditemu, Unit Udara Polis Diraja Malaysia lalu ngesah endur nya, lalu pengawa ngiga dipejalaika ba sebelah genturung pendiau Batu 11, Padawan,” ku Lim.

Raban operasyen niga saspek nya ngaul Unit K9 Indu Opis Kontinjen IPK Sarawak, Opis Jil Puncak Borneo sereta Unit K9 Jil Puncak Borneo ti ngempang endur nya.

“Dalam timpuh lima hari tu, endur ngiga mekuh dipejalaika ba endur besemak enggau jil Puncak Borneo,” ku Lim.

“Entara genturung pendiau ti ditasat iya nya PR1MA, Batu 11, sebelah kubur Cina Batu 15, Landeh, Kampung Jawa enggau Semenggok.”

Kedua-dua saspek sebedau tu ditan ba baruh Seksyen 457, Kanun Keseksaan enggau Seksyen 39B, Akta Dadah Berbahaya 1952.

Maya kes tu nyadi kena Hari Empat ti udah, empat iku saspek ngelarika diri ari palan transit ba Jil Puncak Borneo urung pukul 5.11 lemai.

Taja pia, raban pematau jil mujur nangkap baru dua iku ari sida iya urung pukul 6.25 lemai enggau 10.50 malam ba sebelah genturung pendiau PR1MA ti semak enggau jil.

Tags: #ib

Join our social media channel to get our news Alerts and highlights.

Leave a Reply

Your email address will not be published.