COVID-19: Pelilih Kuching Ngerikod 6 Kes Sehari Tu

Spread the love

KUCHING: Sehari tu, Sarawak ngerikodka 6 kes positif baru COVID-19. Semua kes nya tadi ari pelilih Kuching, iya nya 3 kes ari Kluster Wisma Saberkas, siti kes ari Kluster Greenhill, siti kes ari peresa kediri empu enggau siti kes ari orang ke ngembuan simptom.

Tu ngujungka penyampau semua kes positif COVID-19 di Sarawak nambah ngagai 942 kes.

Kelimpah ari nya, Chairman Komiti Pengatur Penusah Ngenyit Nengeri Sarawak (JPBNS), Datuk Amar Douglas Uggah Embas madahka, sehari tu nadai kluster baru diripotka, ti ngujungka enam kluster benung aktif di Sarawak, iya nya Kluster Greenhill, Kluster Wisma Saberkas, Kluster Bah Arnab, Kluster Baki, Kluster Seladah enggau Kluster Putra.   

Pelilih Kuching meruan bestatus merah enggau penyampau semua 122 kes kena rampit setempat diripotka dalam timpuh 14 hari ti udah. Pelilih Miri, Lundu enggau Limbang mega meruan bestatus kuning.

Sehari tu mega, penyampau 12 kes baru ti udah suman enggau dikemendarka pansut ari sepital. 134 iku agi benung diperubat enggau dipasukka ba wad isolasyen sepital.

Kelimpah ari nya, penyampau 21 PUI baru diripotka sehari tu enggau 3 PUI agi benung nganti pemutus peresa makmal.

Tags: #ib

Join our social media channel to get our news Alerts and highlights.

Leave a Reply

Your email address will not be published.